کەناڵی ئاسمانی گەلی کوردستان

  Live

هەواڵەکان

پاریس سان جێرمان یاری لوتكەی لەبایرن میونشن بردەوە

.

11:40 - 08/04/2021

لە یاریگای ئەلیانز ئەرینا و لە كەشێكی سارد و بەفرباریندا هەردوو یانەی بایرن میونشنی ئەڵمانی و پاریس سان جێرمانی فەرەنسی لەیاری چوونی قۆناغی چارەكی كۆتایی خولی یانەپاڵەوانەكانی ئەوروپا روبەروی یەك بوونەوە.
سەرەتای یاریەكە بەهێرشەكانی یانەكەی پاڵەوانی وەرزی رابردوو دەستیپێكرد و چۆبۆ مۆتینگ نزیك بوو گۆڵ تۆمار بكات، بەڵام لێدانە سەرەكەی بەر ستونی گۆڵ كەوت، لە دەقیقەی 3 و لەیەكەم هێرشدا كیلیا مباپێ بەئەسیستی نەیمار تۆڕی گۆڵی نۆیەری هەژاند و پاریس سان جێرمانی بەگۆڵێك پێشخست، دوای ئەوە یانە باڤاریەكە هێرشەكانی چڕكردەوە، بەڵام ناڤاس رێگری لەمەترسییەكانی مۆلەر و باڤارد كرد، لەدەقیقەی 28 نەیمار داسیلڤا جارێكی تر رۆڵی دروستكەری گێڕا و تۆپێكی ئاراستەی ماركینیۆسی هاونیشتمانی كرد و كاپتنەكەی پاریس سان جێرمان گۆڵی دووەمی پێ تۆماركرد كە لەدوای ئەو گۆڵە ماركینیۆس بەهۆی پێكانەوە یاریگای بەجێهێشت، لەدەقیقەی 37 دا چۆبۆ مۆتینگ بەلێدانی سەر گۆڵێكی بۆ بایرن میونشن تۆماركرد و لە گێمی یەكەمدا جیاوازیەكەی  بۆ گۆڵێك كەمكردەوە.
لەسەرەتای گێمی دووەم پاریس سان جێرمان نزیك بوو لەرێگەی نەیمار گۆڵی سێیەم تۆمار بكات، بەڵام نۆیەری گۆڵچی رێگری لێ كرد، دوای ئەوە هێرشەكانی خاوەن یاریگا بۆ سەر گۆڵی یانەی میوان دەستیپێكرد و لەدەقیقەكانی 53 و 54 كەیلۆر ناڤاسی گۆڵچی ئاست بەرزانە پارێزگاری لەتۆڕی گۆڵەكەی كرد و مەترسییەكانی ئەلابا و باڤاردی گەراندەوە، لەدەقیقەی 60 تۆماس مۆلەر بەلێدانی سەر گۆڵێكی تۆماركرد و ئەنجامەكەی لەبەرژەوەندی یانەكەی یەكسانكردەوە و یاریەكەی گەراندەوە خاڵی سەرەتا، بەڵام خۆشیەكانی یانە ئەڵمانیەكە بۆ یەكسانكردنەوەی ئەنجامەكە زۆر درێژەی نەكێشا و لەدەقیقەی 68 و لەهێرشێكی هەڵگەرانەوە كیلیان مباپێ یاری بە بەرگریكاران و گۆڵچی بایرن كرد و گۆڵی دووەمی خۆی و سێیەم و پێشكەوتنی یانە پاریسیەكەی تۆماركرد.
دوای ئەوە یاریزانانی بایرن بەهەموو توانای خۆیانەوە هەوڵی یەكسانكردنەوەی ئەنجامەكەیاندا، بەڵام سەركەوتوو نەبوون و لەكۆتایدا پاریس سان جێرمان یاریەكەی بە3 گۆڵ بەرامبەر بە 2 گۆڵ بردەوە پێش ئەوەی سێ شەممەی داهاتوو لەیاریگای پارك دو پرانس و لەیاری گەرانەوە میوانداری بایرن میونشن بكات.

لە تۆڕە کۆمەڵایەتیەکان شەیری بکە

GK Sat Frequencies

NileSat:V:11636 - 27500

سەرەوە