.
01:54 PM - 15/01/2019
شەپۆلێكی بەفربارینی زۆر بە رەشەباوە بەشێكی زۆری ناوچەكانی ئێرانی گرتۆتەوە و شەپۆلەكەش لە عیراق نزیكدەبێتەوە.
مورتەزا سەلیمی سەرۆكی دەزگای فریاكەوتن و رزگاركردن لەئێران رایگەیاند: شەپۆلێكی بەفربارینی بەهێز بەكڕێوە و رەشەباوە زیاتر لە 14 پارێزگای ئێرانی گرتۆتەوە و لە نێو ئەو پارێزگایانەشدا شارەكانی رۆژهەڵاتی كوردستانی گرتۆتەوە و رێژەیەكی زۆر بەفر لەو ناوچانە باریوە.
سەرۆكی دەزگای فریاكەوتن و رزگاركردن لەئێران ئاماژەی بەوەكردووە: تیمەكانیان توانیویانە بەهانای زیاتر لە هەزار و هەشت كەسەوە بچن كە لەناوچە شاخاوییەكان و دانیشتوانی گوندەكان دووچاری گیرخواردن و ئاستەنگی بوونەتەوە. وتیشی: توانراوە سێ كەسی بریندار رزگاربكرێت و بەرەو نەخۆشخانە بگوازرێنەوە بۆ چارەسەركردن و هەروەك زیاتر لە 275 ئۆتۆمبیلی گیرخواردوو لەبەفردا رزگاربكرێت.
هاوكات بەپێی پێشبینییەكانی دەزگا كەشناسییەكان، پێشبینی دەكرێت ئەو شەپۆلە بەفربارین و كڕێوەیە بەشێك لە پارێزگاكانی عیراقیش بگرێتەوە، بەتایبەتیش پارێزگاكانی سلێمانی و هەولێر و دهۆك.
لە تۆڕە کۆمەڵایەتیەکان شەیری بکە