.

05:25 PM - 16/06/2018

كۆمپانیای گازپرۆمی ڕوسی رایگەیاند: بەرهەمهێنانی نەوتی خاو لە كێڵگەی نەوتی گەرمیان گەیشتۆتە ٢٣ هەزار بەرمیل لە ڕۆژێكدا.
گازپرۆم لە بەیاننامەیەكدا ئاشكرایكردووە: ئاستی بەرهەمهێنانی نەوتیان لە كێڵگەی گەرمیان بۆ 23 هەزار بەرمیل لە رۆژێكدا زیادكردووە، كە دەكاتە 3 هەزار‌و ١٠٠ تۆن‌و پەرەپێدانی كێڵگەكەش بەردەوام دەبێت هەتا تواناكەی دەگاتە 35 هەزار بەرمیل نەوت لە ڕۆژێكدا.
ئەوە لەكاتێكدایە كۆمپانیای گازپرۆم لەمانگی نیسانی ئەمساڵدا ڕایگەیاند: بیری دووەمی لە كێڵگەی سەرقەڵا لە بلۆكی گەرمیان گەیاندۆتە قۆناغی بەرهەمهێنانی بازرگانی‌و بڕیارە لە پایزی ئەمساڵیشدا كاركردن لە بیری سەرقەڵا-3 دەسـتپێبكات.
ناوچەی گەرمیان خاوەنی 7 بلۆكی نەوتییە‌و یەدەگی نەوتەكەی بە 20 ملیار بەرمیل نەوت دەخەمڵێنرێت، كۆمپانیای گازپرۆمیش لەساڵی 2011وە دەستیكردووە بە كاركردن لە كێڵگەی نەوتی گەرمیان‌و لەساڵی 2015دا پرۆسەی بەرهەمهێنان تیایدا دەسـتیپێكردووە.