.jpg)
.
04:46 PM - 20/08/2017
لەچوارچێوەی بەڕێوەچوونی كۆنگرەی "كوردستان، نیشتمانیی هاوڵاتیبوون‌و یەكسانی ماف"، مەلا بەختیار، لێپرسراوی دەستەی كارگێڕی، لەوەڵامی پرسیاری كەناڵەكانی راگەیاندنی دایەوەو لەسەرەتاشدا، لەبارەی كۆنگرەكەوە، ئاماژەی بۆ ئەوەكرد، كە:
ئێمە بەئومێدی سەركەوتنی كۆنگرەكەین، بڕیارەكانی كۆنگرەكەش چۆن دەبێ یان نا، دەبێ چاوەڕوانبین. بەڵام ئەم بەڕێزانەی ئامادەن، هەموو ئەو بەڕێزانەن كە پەیوەندییەكی باشیان لەگەڵ كوردو ئیدارییەكانی كوردستان لەناوچەكەدا هەیەو زۆریش رازین لەو خزمەتانەی كە لەكاتی لێقەومان‌و پێشتریش، پێشكەشیان كراوە.
بۆیە، ئومێدەكەین كۆنگرەكە، سەركەوتووبێ‌‌و ئەم بەڕێزانەشی كە بەشدارن، (196) شێخی عەرەبن‌و هیواخوازین بڕیارێكبدەن، قۆناغێكی نوێ لەپەیوەندییەكانمان، بەپێی ئەوەی گریبەستێك هەبێ، یان رێككەوتنێك هەبێ لەنێوان كورد و عەرەب لەناوچەكەدا، بۆ ئەوەی ئەرك‌و ئامانجە هاوبەشەكان بەرەو بەدیهێنان بێت‌و بشتوانرێت كێشەكان چارەسەر بكەین.
*لەبارەی مادەی (140)و ناوچە جێناكۆكەكان‌و پابەند نەبوونی بەغدادیش بە بەڵێنەكانەوە، وتی:
مادەی (140) مادەیەكی دەستورییە، كە مایەی هەمواركردنەوە نییە. جێبەبەجێنەكردنیشی لەوادەی خۆیدا، كە دەبوو لە (2007 و 2008) جێبەجێ بكرایە، بەڵام تێپەڕینی دە ساڵ بەسەر جێبەجێنەكردنیدا، نەك شەش مانگ، یان ساڵ و دوو ساڵ، لەكاتێكدا نە داعش و نە بەرەی نوسرە لەئارادا نەبوون‌و ئەم كێشانەشی ئێستا هەیە، ئەو كاتە نەبوون. نە عیراق قەرزار بوو، نە هیچ كام لەم كێشانەش لەئارادا بوون، كەچی مادەی (140) جێبەجێ نەكرا..!
جێبەجێنەكردنی ئەو مادەیەش، كوردی زۆر نیگەران كردووە! بۆیە باوەڕمانوایە ئەو سیاسەتەی كە لەسەردەستی حكومەتەكانی دوای روخانی صەدام، تا ئێستا بۆ جێبەجێ نەكردنی مادەی (140) پەیڕەوكراوە، هەمان سیاسەت لەبودجەو مووچە، لەچارەسەر نەكردنی كێشەی نەوت و غاز، لەدیاری نەكردنی سنوری كوردستان، لەچەكدار نەكردنی هێزی پێشمەركەو لەكێشەی نەبوونی هاوبەشی راستەقینەی كورد لەبەغداد، كە ئێستا دوو وەزیرمان هەیە، رەنگ دەداتەوە. وەزیرەكانیشمان، یەكێكیان وەزیری كچ‌و كۆچبەرانە، كە بەتەنها خزمەتی ئاوارە عەرەبەكان دەكات، چونكە كورد ئاوارەی نییە. وەزیرەكەی تریشمان، وەزیری رووناكبیریی و راگەیاندنی عیراقە، ئاشكرایە كە كوردستان بۆ خۆی وەزیری رۆشنبیری هەیەو خزمەتی رۆشنبیریی كورد دەكات‌و وەزارەتی رۆشنبیری یان راگەیاندنی عیراقیش، زۆرتر خزمەتی ناوچەكانی ناوەڕاست‌و خواروی عیراق دەكات‌و ئەوەش ئەركێتی.
كەواتە دەبێ چی بكەین بۆ مادەی (140)؟ نابێ گۆڕانكارییەك لەپرۆسەی پەیوەندییەكانمان‌و دانوستاندنەكانماندا لەگەڵ حكومەتی عیراقدا بكەین! نابێ گرەنتییەكی نێودەوڵەتی بەدیبهێنین.
بەتایبەت ئەوەی لەرابردوودا بەرامبەرمان كراوە، وامانلێدەكات لەدوای نەمانی شەڕی داعش‌و تیرۆر، چەند بەرامبەر مەترسییەكانمان زیاد دەكات.
*سەبارەت بەكۆبوونەوەكەی پارتی و گۆڕانیش، كە بڕیارە سبەی كۆببنەوە، ئاماژەی بۆ ئەوەكرد:
یەكەم، بەشاهێدی هەموو لایەك، یەكێتیی رۆڵێكی گەورەمان هەبووە، بۆ ئەوەی پەرلەمان بەبێ مەرج كارا بكرێتەوە. ئێستاش كە كاتی كاراكردنەوەی پەرلەمان لە (12 و 13)ی مانگ دواكەوتووە، لەسەر داوای یەكێتیی بووەو هەڵە تێگەیشتنێك دروستبوە‌و بەهەڵە ئاماژەمان بەكاتەكەی نەكردووە، بەڵكو لە(29)ی مانگی رابردوو بڕیاردرا، "ئەو پەڕی لەدوو هەفتەدا، پەرلەمان كارا بكرێتەوە"، كە ئەو وادەیەش دەكەوتە (12 و 13)ی ئەم مانگە. بەڵام كاتێك دوو هەفتە پێشئەوەی وادەكە بێتە پێشەوە، بینیمان كە هێشتا كێشە سیاسییەكان‌و یەكڕیزی نیشتمانی چارەسەر نەكراوە‌و متمانەكە پێویستی بەكاتی زیاترە، بۆیە یەكێتیی داوای هەم لەجەنابی كاك مەسعود و هەم لەكۆبوونەوەی لیژنەی باڵای ریفراندۆم كرد، كە دەبێ وادەكە دوابخرێ، بۆ ئەوەی كات بە برادەرانی گۆڕان‌و كۆمەڵ بدرێت. لەبەرئەوە ئەگەر ئەمەمان بەچاكە بۆ نانوسرێت، نابێ بەخراپەش بۆمان بنوسرێت! نابێ بە تانەو تەشەرو قسەی ئەملاو ئەولا بكەن‌و بڵێن: پێتان نەكراوە! نەخێر.. پێنەكردن نییە، بەڵكو ئەمە داوای یەكێتیی بووە، بۆ ئەوەی كاتێكی زۆرتر بدەین بەچارەسەرەكە.
ئەم كۆبوونەوەیەشی دەكرێت، كۆبوونەوەیەكی چاوەڕوان كراوبوو، چونكە لەڕاستیدا نەكردنی كۆبوونەوەكە نیگەرانی زۆری دروستدەكرد. مادام كۆبوونەوەش دەكرێت، بەدڵنیاییەوە ئەم دوو حزبە، سەركردایەتییەكانیان بەئەزمونن‌و دوو حزبی سەرەكین لەكوردستاندا. بۆیە پڕ بەدڵ ئومێدەوارین، چۆن ژینگەكەمان رەخساند، ئەم دوولایەنە كۆببنەوە، هەر بەوشێوەیەش لەناو كۆبوونەوە داخراوەكاندا، بەمژدەیەكی باش بێنە دەرەوە‌و بەخەڵكی بدەن.
هەر ئەوەندەش دەڵێم: كە دەسەڵاتی سیاسی دەتوانێ بەتەنها كێشە سیاسییەكان چارەسەر بكات، باقی كێشەكانیش دەبێ لەناو پەرلەمان چارەسەر بكەین، چونكە مەرج نییە سەد لەسەد كێشەكان چارەسەر بكەین، بەڵكو ئەوەی لەڕووی سیاسییەوە پێمانكرا، بۆ یەكڕیزی نیشتمانی، بۆ دیالۆگ، بۆ كارئاسانی كاراكردنەوەی پەرلەمان كردمان.. ئێستاش، كێشەمان ماوە؟ بەڵی، ماومانە، لەكوێ دەبێ چارەسەری بكەین؟ بێگومان كێشەی یاسایی، كێشەی سیستەمی هەرێم، كێشەی سەرۆكایەتی و ئابوری هەرێم، هەمووی دەبێت بچێتەوە ناو پەرلەمان.
*لەبارەی سەردانی وەفدی باڵای ریفراندۆمیش بۆ بەغداد، لێپرسراوی دەستەی كارگێڕی، وتی: ئەو وەفدە بەدەسەڵاتەوە چۆتە بەغداد. دەسەڵاتەكەشی ئەوەیە كە هەڵوێست و بڕیارەكانی لیژنەی باڵای ریفراندۆم‌و حزبە سیاسییەكان رونبكاتەوە، بەهیچ شێوەیەك بۆی نییە رێككەوتن ئیمزا بكات‌و نە بۆشی هەیە، هیچ پێشنیازێكی ئەوان رەتبكاتەوە. ئەگەر هەر پێشنیازو پرۆژەیەكیش هەیە، وەفدەكە دەیهێنێتەوە بۆ حزبەكانی كوردستان‌و لیژنەی باڵای ریفراندۆم‌و ئەگەر پەرلەمانیش كارا كرایەوە، ئەوا دەچێتە ناو پەرلەمانیشەوە. ئەگەر هیچ پێشنیازێك‌و پرۆژەیەكیش لەبەغداد نییە، بۆ ئەوەی گرەنتی ئەلتەنارتیڤێكی باشتر بەكورد بدەن، كە ریفراندۆم بۆ ماوەیەكی كەم دواخرا، ئەو گرەنتی‌و ئەلتەرناتیڤە، لیژنەی باڵای حزبەكانی كوردستان‌و لیژنەی باڵای ریفراندۆم‌و بەزوترین كاتیش كە پەرلەمان كاراكرایەوە، ئەوا هەر ئەلتەرناتیڤێك، كە گرەنتی بێ بۆ دەستكەوتەكانی ئەم قۆناغە، ساڵێك، شەش مانگ یان هەرچەندێكە و دەتوانین رێكبكەوین لەگەڵی، ئەوا ئەو ئەلتەرناتیڤە، ئەگەر گونجاوبێ، بێگومان بەشبەحاڵی خۆمان لێپرسراوانە، گفتوگۆی ئەلتەرناتیڤە گونجاوەكەش دەكەین. بەڵام بڕیاری ریفراندۆم تا ئەم چركەساتە، لەدەسەڵاتی هیچ كەسێكدا نییە بیگۆڕێت.
لە تۆڕە کۆمەڵایەتیەکان شەیری بکە
